༄༅།།མཚོ་སྔོན་ཞིང་ཆེན་བོད་སྨན་ཁང་།青海省藏医院藏医藏药-藏医专家

མཚོ་སྔོན་བོད་ཀྱི་གསོ་རིག་སློབ་ཚོགས་ཀྱིས་སྐབས་དང་པོའི་དབྱིན་ཡིག་སྦྱོང་བརྡར་འཛིན་གྲྭ་འགོ་ཚུགས་པའི་མཛད་སྒོ་༢༠༡༠ལོའི་ཟླ༣པའི་༢༠སྤེལ།ཚོགས་འདུར་མཚོ་སྔོན་ཞིང་ཆེན་བོད་ཀྱི་གསོ་རིག་སློབ་ཚོགས་ཀྱི་དྲུང་ཡིག་ཆེན་མོ་དང༌། ཞིང་ཆེན་བོད་སྨན་ཁང་གི་ཡོན་ཀྲང་གཞོན་པ་དབང་ཆེན་ཚེ་བརྟན། ཞིང་ཆེན་བོད་སྨན་ཁང་གི་ཡོན་ཀྲང་གཞོན་པ་དོན་འགྲུབ། དགེ་རྒན་Kristel Jonnelle Ouwehand སློབ་མ་ཡོངས་བཅས་ཞུགས་ཡོད། ཚོགས་འདུའི་འགོ་འཛིན་པ་དོན་འགྲུབ་ཀྱིས་འཛིན་གྲྭའི་ཕྱི་རྒྱལ་དགེ་རྒན་དང༌། འཛིན་བདག ཞིང་ཆེན་ཕྱི་ནང་གི་དགེ་རྒན་གྲགས་ཅན་དག་མཚམས་སྦྱོར་བྱས། དབང་ཆེན་ཚེ་བརྟན་གྱིས་སྦྱོང་བརྡར་འཛིན་གྲྭའི་གལ་ཆེན་རང་བཞིན་དང༌། སློབ་སྦྱོང་གི་དམིགས་ཡུལ་དང་ཡུན་རིང་གི་འཕེལ་རྒྱས།ལོ་ཙཱ་བཅས་ཀྱི་ཕྱོགས་ནས་བཤད་གླེང་བྱས་པ་མ་ཟད། ཐེངས་འདིའི་ཕུལ་བྱུང་གི་སློབ་མ་དག་ལ་རྟེན་འབྲེལ་ཞུས། བོད་ཀྱི་གསོ་རིག་སློབ་ཚོགས་ཀྱིས་སློབ་མ་ཡོངས་ལ་སློབ་ཡོན་མེད་པར་དགེ་རྒན་བཟང་པོའི་སློབ་ཁྲིད་གནང་རྒྱུ་ཡིན་པས་དབྱིན་ཡིག་སློབ་པའི་གོ་སྐབས་ཤིན་ཏུ་བཟང༌། ཐེངས་འདིའི་སྦྱོང་བརྡར་གྱི་ཡུན་ཟླ་དྲུག་ཡིན་ལ། ཞིང་ཆེན་དང་གྲོང་ཁྱེར་ལྔ་ནས་ཡོང་བའི་སློབ་མ་དང་དགེ་རྒན་སོགས་ལས་རིགས་མི་འདྲ་བ་སོ་སོ་ནས་མི་༧༠ལས་བྱེད་ཐབས་གང་ཡིན་གྱིས་འདེམ་གསེས་བྱས་ནས་མཇུག་མཐར་ཕུལ་བྱུང་སློབ་མ་༢༠བསྡུ་ལེན་བྱས།