| སྦྱར་དུག་ལ། ཕྱི་ནང་གསང་རྟགས་རྒྱས་པར་མན་རྒྱུད་ལས་གསུངས་པ་ལྟར་ཤེས་དགོས་པ་ལས་ཕྱོགས་རེས་མི་རྟོགས་ཀྱང༌། མདོར་སྡུས་ཕྱི་རྟགས་ནང་སྔ་ནམ་ལངས་གཏམ་མ་ལབས་ཁ་ཟས་མ་ཟོས་སྐབས་མཆིལ་མ་མ་དཀྲོག་པར་རང་ལུགས་དེ་རྒྱ་ཙང་ཕོར་གང་དུ་བླུགས་པས་ཁར་ལྡིང་ན་མིན་ལ་གཏིང་དུ་སོང་ན་ཡིན། ཡང་དཀར་གོང་མེས་བསྲེགས་པའི་སྟེང་མཆིལ་མ་བླུགས་ལ་གྲང་ནས་བཅག་པས་ནས་གང་ཙམ་ནག་པོར་སོང་ན་ཡིན། ནད་རྟགས་རྩ་རྒྱུད་འགྱུར་ལྡོག་མང་ལ་གདོན་རྩ་དང༌། ཆུ་མདོག་མ་ངེས་པ་སྣ་ཚོགས་འགྱུར། ཟངས་ལ་བྱུགས་ན་ནག་པོར་འགྲོ།ནད་སྣ་མང་ཞིང་འགྱུར་ལྡོག་ཆུང༌། ཟས་ཟོས་ཀྱང་ལུས་སྟོབས་འཆོར། ཕོ་མཆིན་མི་བདེ། ཆམས་རིམས་མང་དུ་ཕོག སྙིང་མི་དགའ། དོན་མེད་པར་ན་ཞིང་དོན་མེད་དུ་དྭངས་པ་རྣམས་དུག་རྟགས་ཡིན། གསང་རྟགས་རེ་རལ་བའི་འོ་མར་བཏབ་པ་བཏང་བས་སྐྱུགས་པ་དང༌། སྡུད་སྨན་བཏང་བས་འདུས་རྟགས་བྱུང་ན་ངེས་པ་ཡིན། དེ་ལ་ཐོག་མར་སྡུད་སྨན་ཐང་ཆེན་ཉེར་ལྔ། བྱང་ལུགས་སྔོ་ཐང་བཅུ་གསུམ་རིགས་གཉིས། བསེ་རུ་བཞི་ཐང་རྣམས་བཏང༌། འདུས་རྟགས་ལུས་ལྕི་ཞིང་སྒྱིད་པ་བསྐྱུར། ཡི་ག་འགག ཁ་ལྕེ་སྐམ། ཕོ་བར་ཚ་རུབ་བྱེད། དེ་ལྟར་མ་བྱུང་བར་སྡུད་སྨན་ནན་བསྐྱེད་ཅིང་སྐབས་སུ་མཐིལ་བཞི་སྐུ་མཉེ་དང༌། ཕོ་བར་རུས་དུགས། རྒྱུ་ཞབས་ལ་བྱེ་མའི་དྲོད་དུགས་བྱ། དངོས་གཞི་རྒྱུད་ཀྱི་ཅོང་ཞི་བསིལ་སྦྱོར་དུག་སྨན་ཁ་ཚར་ཅན། གུར་གུམ་བཅུ་གསུམ་ཁ་ཚར་ཅན། དབང་རིལ་ཉེར་ལྔ། གཡུ་རྙིང་ཉེར་ལྔ། དཔའ་བོ་བཅུ་གཉིས་ཁ་ཚར་ཅན། བྱེ་རིང་བསེ་རུ་བཞི་སྦྱོར་ལྡེ་སྒྱུར་བཅས་པ། ཁྱད་པར་ཀོ་ཋའི་སྦྱོར་བ་རྣམས་ཀྱིས་གསོད། མ་ཐུབ་ན་ཀོ་ཋའི་ཆིག་སྦྱོང་སོགས་ཀྱིས་དག་པར་བྱས་རྗེས།དུག་འཇོམས་རྨ་བྱའམ། པུ་རི་སྐྲ་ཆིངས་ཀྱི་ལག་ལེན་ལྟར་བཏང་བས་ཕན་ཆེར་འབྱུང༌། ལོག་གནོན་རིན་ཆེན་རིལ་བུ། ཁྱད་པར་རིན་ཆེན་ཡང་ཟབ། མང་སྦྱོར་ཆེན་མོ། དབང་རིལ་རྟ་རི་མ་དང༌། ཤེལ་དཀར་མཆོད་རྟེན་རྣམས་གཅིག་ཆོག་ཏུ་འགྱུར། རྒྱབ་བརྟེན་གདོན་བཅོས་བྱ།སྔ་དྲོའི་རིགས་ལ་ཁ་ཟས་སྤང༌། ཕྱི་དྲོར་ནན་བསྐྱེད་ནས་བཟའ། ཉ་ཕག་གི་ཤ་རུལ་སྐྱུར། བཤུལ་ཆགས་ཤ སྔོ་ངད་སོགས་སྤང༌། བ་ལང་གནའ་དགོའི་ཤ་གསར། ཁུར་མང་འབྲས་དང་ཡོས་ཐུག་ཇ་སོགས་བཏང༌། ཟུངས་ངན་ལ་ཆང་གསར་ཤ་ཡིབ་སོགས་ཚོད་སྦྱར་བསྟེན། ནད་འདིས་ཟིན་ནས་ཉལ་པོ་དང་བཞོན་པ་ཞོན་པ། ངལ་དུབ་ཀྱི་ལས། སྨྲ་བརྗོད་མང་པོ། ཉིན་གཉིད། རླན་གྲང་སོགས་སྤང་དགོས། ནད་འདི་རྒྱུ་དང་བབས་ས་སོགས་མི་འདྲ་བ་ཤིན་ཏུ་མང་བས་བརྟག་དང་བཅོས་ཐབས་ཐམས་ཅད་མན་ངག་རྒྱུད་ཉིད་ལ་དཔང་པོར་བྱ་བ་གལ་ཆེའོ།།
ཁ་ཟས་མ་འཕྲོད་པ་དང་མ་གོམས་པ་དང་དུས་མིན་ཟོས་པ་སོགས་མེ་དྲོད་ཀྱིས་འཇུ་བར་མ་ནུས་པར་དྭངས་སྙིགས་འདྲེས་ཏེ་རྩ་མིག་ཏུ་བྱེར་བས་གྱུར་དུག་ཏུ་སོང༌།ནད་རྟགས་རླུང་མཁྲིས་སོགས་སྡོང་ཟླ་ལྟར་སྟོན། ཕོ་བ་རྩིབས་ལོག་གཟེར། སྒྲེག་ཅིང་སྦོ་ལ་ཟས་འཇུ་དཀའ། རྩ་ཕྲ་ལ་གཏིང་ན་གྲིམས། ཆུ་མདོག་དམར་པོའམ་སྨུག་ལ་ཀུ་ཡ་དུམ་བུར་ཆད།དེ་ལའང་སྦྱར་དུག་ལྟར་སྡུད་གསོད་བཤལ་གསུམ། ཚབས་ཆེ་ན་མང་སྦྱོར་བཏང༌། ཡང་ན་ཐོག་མར་ཕྱི་རྒྱུད་ཀྱི་སེ་འབྲུ་བཞི་བའམ་ད་ལིས་བཞི་བ་བཏང༌།དེ་ནས་ཐོ་རངས་སྤོས་དཀར་ཕག་ཁྲག་སྟར་བུ་སྦྱར་བ་དང༌། སྲོད་ལ་འོ་མའི་ནང་ལན་ཚྭ་བཏབ་པ་ལྟག་སྤྲོད་དུ་བཏང༌། འདུས་རྟགས་ཁོང་པ་སྙོམ།ལུས་ལྕི་ཞིང་མཆིལ་སྣབས་མང༌། ཁ་ཟས་མི་ལེན་པའི་སྐབས། མན་རྒྱུད་གི་ཝང་བཅོ་ལྔ་དང༌། བོང་དཀར་བཅུ་གཅིག་ལྟག་སྤྲོད་ཀྱིས་བཏང་ལ་གང་ཉེའི་གནས་ནས་སྐྱུག་བཤལ་གྱིས་སྦྱོང་བའམ། འདུས་རྟགས་བྱུང་འཕྲལ་སྦྱོང་བསད་གཅིག་དྲིལ་བྱས་ཀྱང་ཆོགདུག་ནད་སྤྱི་ལ་དཔའ་བོ་ཉེར་ལྔ། སུ་མི་བཅུ་གསུམ། ཟུར་མཁར་བའི་སེང་གེ་གསུམ་འགྲོལ་ཉུངས་མའི་ཁུ་བས་ཕུལ་བ་དང༌། གླང་ཐབས་དང་བསྡོངས་པ་དང༌།མ་ཞུ་དུག་ཐབས་བྱུང་བ་རྟགས་གོང་དུ་སོ་སོའི་སྐབས་སུ་བཤད་པ་ལྟར་བཅོས། ཁྱད་པར་མ་ཞུ་དུག་ཐབས་ལ་ཟུར་ལུགས་སྐྱ་ཁྲ་སུམ་འགྲོལ་ལམ།མ་ཞུ་བའི་དུག་བྱུང་འཕྲལ་ཐབ་ཀའི་ནང་ས་ཚིག་དམར་པོ་ཕྱེ་མ་བྱས་པ་ཆུ་བསྐོལ་ཚན་མོར་སྦྱངས་པ་ཕོར་བ་དོ་གསུམ་འཐུངས་པས་སྐྱུགས་འོང་ཞིང༌། དེ་རྗེས་སྨན་བཏང་དགོས་མིན་ནད་ལ་དཔྱད་པས་ཀྱང་ཆོག ཡང་རི་ཀླུང་གི་དྲེས་མའི་རིགས་མང་པོ་ཁཎྜ་རིལ་བུ་ལུག་རིལ་ཙམ་བྱས་པ་ཆུ་བསྐོལ་གྱིས་ཕུལ་བས་ཉིན་རེའི་དུག་ཐབས་དང་མཆིན་པའི་དུག་ཚད་ལ་ཤིན་ཏུ་ཟབ།།
ཤ་དུག་སྤྱི་ལ་གསེར་ཞི་ཁ་སྤྲོད། ཞི་དྲུག་ལ་བྱིའུ་ལ་ཕུག་ཁ་ཚར་བྱས་པའམ།ཞི་དྲུག་རྐྱང་པ་གང་ཡང་འོམ་བུའི་ལོ་མའི་ཐང་གིས་ཕུལ་བ། དཔའ་བོ་ཉེར་ལྔ། ཟླ་ཤེལ། ཟུར་ལུགས་གླང་ཆེན་སུམ་འགྲོལ། འོམ་བུའི་ཆིག་ཐང་ཁོ་ནས་ཕན་ཞིང༌།ཤ་དུག་ཡོད་པར་དོགས་པ་ལ་ཤ་བཙོ་སྐབས་འོམ་ཤིང་མཉམ་དུ་བཙོས་ནའང་ཕན་ཟེར།ཤ་དུག་གྲེ་འགག་འཕྲལ་དུ་མ་བཅོས་ན་ཚབས་ཆེ་བས། དཔའ་བོ་ཉེར་ལྔ།ཞི་དྲུག་དང་བྱིའུ་ལ་ཕུག་སྒོང་ཐོག་པ་འོམ་བུ་རེ་རལ་བཅས་པུཥྤ་བཞི་སྦྱོར་བསྡེབས་པ། རྒྱ་ཚ་བཅུ་གཅིག ཐང་ཆེན་ཉེར་ལྔ།འོམ་ཐང་བཅས་ཟབ་ཅིང་རྒྱུན་རིང་ན་མང་སྦྱོར་བཏང༌། ཡང་ཤ་དུག་དངོས་མིན་པའི་ཤ་ནད་ཅེས་འཁྲུ་སྐྱུགས་བྱེད་པ་སོགས་ནད་རྟགས་སྣ་ཚོགས་ཅན་ཡོད་པ་དེ་ལའང་ཞི་དྲུག་འོམ་ཐང་གིས་ཕུལ་བ་དང༌།རྨ་བྱའི་མདོངས་བདུན་དུ་གྲགས་པའི་ཐང་སོགས་ཀྱིས་ཕན། ཡང་ཨ་རུ། བོང་དཀར། འོམ་བུ། རེ་རལ། བྱིའུ་ལ་ཕུག་རྣམས་ལོ་བརྒྱད་དྲི་ཆུས་ལྕགས་སྣོད་དུ་བཙོས་པའི་ཁུ་བ་གྲང་མོ་མང་དུ་བཏང༌།དེ་རྗེས་ཐང་དེ་ལ་དུར་བྱིད། དན་རོག ཐར་ནུ། ཁྲོན་བུ། སྔོན་བུ་རྣམས་ཐུན་ལོག་བཏབ་ནས་རས་ཐུམ་བྱས་ཏེ་བཙོས་པའི་ཁུ་བས་བཤལ་བཏང་ན་ཤ་ནད་དང་ཤ་དུག་གི་རིགས་ཐམས་ཅད་ལ་ཕན་ནོ།།
དཀར་དུག་གི་རིགས་གང་ལའང་དཀར་པོ་དྲུག་སྦྱོར་ཁོ་ནས་ཆོག་ཅིང༌།དེ་སྟེང་གོ་ཐལ་བསྡེབས་ནས་ལྕུམ་རྩ་བུངས་བསྐྱེད་བཏང་བ་ཕྱུར་ཁུས་ཕུལ་བ་ཟབ།། དངུལ་ཆུའི་དུག་ལ། པི་ལིང༌། ཕོ་རིས། ཅོང་ཞི། མཚུར་ནག བུལ་ཏོག སྟར་བུ་རྣམས་སྦྱར་བའི་གཉེན་པོ་དྲུག་སྦྱོར་ཟབ། ས་མུ་དྲ་ཕ་ལ་ཁར་བཟུང་བས་དངུལ་དུག་ཐུབ། རྐན་སྐྲངས་ཤིང་ཆད་པ་ལ། ཨ་རུ་ར། སྟོད་ཇ། དུ་བ་རལ་བ་ཅན་གསུམ་གྱི་རིལ་བུ་ཉིན་རེ་གཉིས་རེ་ཁར་བཟུང་ཞིང་མཆིལ་མ་ཕྱིར་ཕོས་པས་ཕན།
རིགས་མཐུན་ནང་དོན།
༄༅།། མཚོན་རྨ་གསོ་བའི་སྐོར།༄༅།། གཟའ་ནད་དང་མཛེ་ནད་གསོ་བའི་སྐོར།༄༅།། མོ་ནད་གསོ་བའི་སྐོར།༄༅།། བྱིས་པའི་ནད་གསོ་བའི་སྐོར།༄༅།། ལྷན་སྐྱེས་རྨ་གསོ་བའི་སྐོར།
|
